Don't arrange any reception for me, Spend money on Pakistani Peoples - Chinese PM

اسلام آباد (طاہر خلیل) پاکستان اور چین کے درمیان پر خلوص دوستی کی ایک بہترین مثال اس وقت پیش ہوئی جب پاکستان کے دورے پر آئے ہوئے مہمان وزیراعظم لی کی چیانگ نے پاکستان کے مشکل اقتصادی حالات کا اندازہ کرتے ہوئے کفایت شعاری کے جذبے کے تحت حکام کو ہدایت کی کہ پارلیمنٹ ہاؤس میں سینٹ سے خطاب کے موقع پر ان کیلئے کسی قسم کی مفرحات کا بندوبست نہ کیا جائے، اس یادگار اور تاریخی موقع پر پارلیمنٹ سیکرٹریٹ نے چینی وزیراعظم کیلئے ایک شایان شان اور پُر تکلف استقبالیہ کا اہتمام کیا تھا مگر چینی وزیراعظم نے حکام کے ذریعے واضح پیغام دیا کہ ان کیلئے کسی استقبالیہ کا اہتمام نہ کیا جائے اور یہ رقم پاکستانی عوام کی بہبود کیلئے منتقل کر دی جائے۔ بعد میں چینی وزیراعظم اور وفد کیلئے سادہ چائے اور جوس وغیرہ کا اہتمام کیا گیا مگر مہمان وزیراعظم نے اس سے بھی منع کر دیا اور پارلیمنٹ میں دو گھنٹے قیام کے دوران انہوں نے صرف سادہ پانی پر اکتفا کیا اور پاکستانی قوم کیلئے کفایت شعاری کا بہترین پیغام دیا۔ پارلیمنٹ ہاؤس آمد پر چینی وزیراعظم نے اپنے استقبالیہ کیلئے بچوں سے گلدستے وصول کرنے کے بعد دونوں بچوں کو تحفے میں چینی پاؤنڈ اور بھالو کے کھلونے دیئے۔ سپیکر ڈاکٹر فہمیدہ مرزا کو دیکھ کر مسرت کا اظہار کیا اور صحت کے حوالے سے خوشگوار کلمات کہے۔ کانفرنس روم میں بھی چینی وزیراعظم کی ہدایت کے مطابق مفرحات اور مشروبات نہیں رکھے گئے۔

Source: http://beta.jang.com.pk/NewsDetail.aspx?ID=95049